Tulipop er ævintýraeyja í miðju hafi sem stjórnað er af þremur tunglum. Hún varð til þegar töfraeldfjall gaus neðansjávar fyrir þúsundum ára. Hraunið sem kom í gosinu myndaði eyjuna sem þróaðist í þennan ótrúlega stað sem við köllum Tulipop.

Tulipop er full af fossum, harðgerðum fjöllum, hverum og gullnum söndum. Þar búa sex furðuverur sem eru jafn ólíkar og þær eru yndislegar. Þær eru Gloomy, Bubble, Fred, Miss Maddy, Mr. Tree og Mama Skully.

Tulipop er skemmtilegur og spennandi heimur þar sem ekkert er eins og það sýnist. Íbúar Tulipop virka sætir og krúttlegir en allir eru þeir gallaðir á sinn eigin hátt og kljást við mannleg vandamál. Þau eru óvenjuleg og skrítin fjölskylda.

 

Bubble

Sveppastrákurinn Bubble er hrifnæmur náttúruunnandi og bókaormur. Milli þess sem hann liggur í bókum og spjallar við dýr og blóm og aðrar verur lætur hann sig dagdreyma og hugsar upp ný orð svo eitthvað sé nefnt. Lífið er því nokkuð notalegt hjá þessum ljúflingi nema þegar hann lætur áhyggjurnar ná tökum á sér. Bubble finnst hann nefnilega bera ábyrgð á velferð alls sem lífsandann dregur. Já, og alls hins líka.

Þó Bubble sé friðsamari en fjöður má ekki gleyma því að hann er berserkjasveppur og þegar mikið liggur við fer hann hamförum. Þá blæs hann upp í tífalda stærð sína sem nægir til að stökkva jafnvel mestu hörkutólum á flótta.

Gloomy

Sveppastelpan Gloomy er systir Bubble en líklega er leitun að ólíkari systkinum. Öfugt við hinn hægláta og mjúklynda Bubble er Gloomy ævintýragjörn, hvatvís en þó umfram allt hugrökk. Það er alltaf eitthvað spennandi í gangi hjá þessari dugnaðarkonu. Hún elskar ráðgátur og leyndardóma sem er ástæða þess að hún býr í Svartaskógi við rætur eldfjallsins Kapow. Gloomy er uppátækjasöm að eðlisfari og á það jafnvel til að vera svolítið hrekkjótt.

Oftar en ekki bitnar þessi púkaskapur á Bubble bróður hennar en hei, hver hefur ekki gaman að því að spæla bróður sinn endrum og eins? Þó Gloomy geti átt það til að vera dyntótt ólíkindatól þá sýnir hún það æ ofan í æ að á ögurstundu er enginn sem stendur sig betur undir álagi. Og já, hún hefur alltaf rétt fyrir sér. Alltaf. Og hún getur gert sig ósýnilega. Oftast.

Fred

Fred er sjálfskipaði útlaginn í hópnum. Hann býr djúpt í skóginum og kann best við sig í skuggunum (uppáhaldsliturinn hans er kolkrabbableksvartur). Enginn veit almennilega hvers konar fyrirbæri Fred er en sagan segir að mamma hans hafi verið hreindýr.

Fred hefur alltaf langað að vera ógnvaldur Tulipop en það sem stendur honum fyrir þrifum í þeim efnum er að hann er alltof góður inn við beinið. Hann heldur þó í vonina um að einn daginn takist honum að vekja alvöru ótta og með þá von í brjósti grípur heldur hann áfram að æfa sig. Þó margt í sambandi við uppruna og eðli Fred sé ráðgáta þá er eitt á allra vitorði, ástæðan fyrir hinum afgerandi svarta litarhætti hans er að hann nærist eingöngu á bleksveppum. Bleksveppir í morgunmat. Bleksveppir á kvöldin. Það er ekkert annað á matseðlinum. Lífið er bleksveppur.

Miss Maddy

Hin ofurhæfileikaríka og fjölhæfa prímadonna Miss Maddy er eftirlæti allra sem heimsækja fjölleikahús Tulipop. Hún trúir á mátt ástarinnar og lifir fyrir listina. Ekkert líkar henni betur en þegar henni er hælt í hástert (nema kannski jarðaberjarjómaís með heitri súkkulaðisósu og þeyttum vanillurjóma).

Miss Maddy dreymir stóra drauma, hún er sannfærð um að hennar bíði eitthvað annað og meira og stærra – heimurinn bara verður að fá að njóta þessara stórbrotnu hæfileika! Að maður tali nú ekki um volduga söngröddina sem getur ekki einungis brotið gler þegar hún beitir henni, hún getur (ef henni sýnist svo) stöðvað flóðbylgjur og fengið stjörnur til að hrapa. En það borgar sig að fara vel að henni, hún hefur nefnilega ekki síður mikilfenglegt skap. Sem er ekki alltaf jafn ánægjulegt og allt hitt…

Mr. Tree

Mr. Tree er elstur af Túlípoppurunum, traustur náungi og mikill heimspekingur. Það er ósjaldan leitað til hans því hann er mikill sálusorgari og gefur ráð, sem eru þó stundum svo torskilin að þau kveikja fleiri spurningar en þau svara. Hann er nefnilega verulega „djúpur“. En Mr. Tree er svo mikið gæðablóð að honum fyrirgefst þó ráðin hans séu illskiljanleg (og um leið næstum gagnlaus), það fara flestir sáttir frá honum. Að vísu svolítið ráðvilltari, en sáttir samt.

Mr. Tree hefur aðeins einn breyskleika, svo vitað sé, hann er syndsamlega sólginn í eðalsteina. Fallegustu gimsteinarnir í safninu hans hafa myndast úr sönnum hamingjutárum, því Mr. Tree hefur þá náðargáfu að geta umbreytt tárum í demanta. Þess vegna grætur hann alltaf svolítið á hverjum degi. En það er líka svo gott fyrir sálina.

Mama Skully

Mama Skully er fjölskyldumóðirin og elsti íbúi Tulipop. Hún er hinn raunverulegi skapari eyjunnar. Þegar neðansjávar eldfjall gaus fyrir þúsundum ára, kom Mama Skully upp á yfirborðið með hrauninu og endaði á Skull Rock.

Mama Skully plantaði Mr. Tree og gaf restinni af eyjunni líf. Hún er mjög forn og geymir minningar langt aftur í tímann. Hún elskar ljóð, menningu og listir og telur að hún hafi verið skáld í fyrra lífi, eða jafnvel sjóræningi en hún man það ekki alveg ... kannski bæði! Mama Skully elskar alla meðlimi Tulipop fjölskyldunnar en hún er oftast beinskeitt og þurr á manninn og lætur sjaldnast tilfinningar sínar í ljós. Hún og Mr. Tree eru eins og gamalt par sem þrasar allan daginn. Hún er kaldhæðin með eindæmum og miskunnarlaus en lítur á alla íbúa Tulipop sem fjölskyldu sína.

Hún er mjög fróð en deilir vitneskju sinni ávallt á dulmáli, í formi gáta og ljóða, sem gerir allt sem hún segir leyndardómsfullt. Það er aðallega vegna þess að hún nýtur þess að fá athygli fyrir að vera dularfull, en líka vegna þess að hún er hrædd um að Tulipoppararnir munu gleyma henni.